Lex Libertas eis konsekwente diplomatieke standaarde ná plasing deur die Iraanse ambassade

Pretoria – Die ideesentrum en voorspraakgroep, Lex Libertas het ’n ope brief aan die Departement van Internasionale Betrekkinge en Samewerking (DIRCO) gerig waarin dringende opheldering en optrede geëis word ná ’n sosiale media-plasing deur die Iraanse ambassade in Suid-Afrika waarin beelde van Amerikaanse doodskiste vertoon word.

Die brief volg nadat DIRCO onlangs besluit het om die nuutaangestelde Amerikaanse ambassadeur, Brent Bozell, in te roep nadat hy in die openbaar verklaar het dat die dreunsang “Kill the Boer” haatspraak is. DIRCO het die ambassadeur se opmerkings as ondiplomaties beskryf.

Volgens Lex Libertas wek die plasing deur die Iraanse ambassade ernstige kommer oor of die Suid-Afrikaanse regering diplomatieke standaarde konsekwent toepas. Die feit dat die plasing sedertdien deur die Iraanse ambassade verwyder is is, wat Lex Libertas betref, irrelevant.

“DIRCO het vinnig opgetree toe die Amerikaanse ambassadeur ’n mening uitgespreek het oor ’n dreunsang wat objektief-gesproke op haatspraak neerkom,” het dr Ernst Roets, uitvoerende direkteur van Lex Libertas gesê. “Beelde wat die dood van buitelandse burgers vier, is egter ’n veel ernstiger saak. Die publiek het die reg om te weet of dieselfde standaarde toegepas gaan word.”

In die ope brief doen Lex Libertas ’n beroep op DIRCO om te verduidelik of diplomatieke optrede teen die Iraanse ambassade oorweeg word en om die publiek in te lig oor watter stappe, indien enige, geneem word.

“Die geloofwaardigheid van Suid-Afrika se buitelandse beleid hang daarvan af of sy beginsels konsekwent toegepas word,” het Roets gesê.

• Die volledige ope brief kan hier gelees word.

Lex Libertas is 'n ideesentrum en voorspraakgroep wat werk aan ’n lewensvatbare politieke bedeling in Suid-Afrika, gebaseer op die beginsels van vryheid, desentralisasie en selfbestuur.

Om Lex Libertas te ondersteun, klik hier.