MK-Party se aanval op Artikel 235 is ’n aanval op die onvervreembare reg op selfbeskikking

PRETORIA — Die MK-party se poging om Artikel 235 van die Suid-Afrikaanse Grondwet te herroep, is ’n simboliese maar doelbewuste aanval op die onvervreembare reg van gemeenskappe om oor hul eie sake te besluit.

Artikel 235 was nooit die volledige oplossing nie, maar dit bly die enigste uitdruklike grondwetlike erkenning dat Suid-Afrika se diverse nasies die reg op selfbeskikking het. Deur dit te probeer uitwis, stuur die MK-party ’n duidelike boodskap: die gesentraliseerde staat moet weier om selfs te erken dat gemeenskappe ’n vae reg tot hierdie effek het.

Suid-Afrika ly reeds aan ’n hoogs gesentraliseerde eenheidstaat wat struktureel nie in staat is om oor sy uitgestrekte en diverse gebied te regeer nie. Dit is duidelik dat die oplossing lê in desentralisasie en die erkenning van hoër vlakke van selfbestuur. Die herroeping van Artikel 235 sou daardie mislukking verskans en die grondwetlike ruimte vir vreedsame, demokratiese desentralisasie vernou.

Die pad vorentoe is nie die erosie van regte nie, maar die aktivering van selfbestuur deur ’n gedesentraliseerde politieke stelsel.

Lex Libertas sal kommentaar in hierdie verband aan die Parlement voorlê.

Lex Libertas is ’n ideesentrum en voorspraakgroep wat werk vir ’n lewensvatbare politieke bedeling in Suid-Afrika, gebaseer op die beginsels van vryheid, desentralisasie en selfbestuur.

Ondersteun Lex Libertas hier.