Lex Libertas rig ope brief aan minister van Binnelandse Sake teen digitale ID-stelsel

PRETORIA – Die ideesentrum en voorspraakgroep, Lex Libertas, het vandag ’n oop brief aan dr Leon Schreiber, minister van Binnelandse Sake, gepubliseer waarin die minister versoek word om die voorgestelde digitale identiteitsregulasies terug te trek en in die openbaar te reageer op ’n lys ernstige bekommernisse wat deur die publiek geopper is.

In die afgelope paar dae het duisende besorgde burgers hul teenstand teen die voorstel deur Lex Libertas se sosialemediakanale geregistreer. Die oop brief waarsku dat, hoewel die stelsel as ’n vrywillige gerief voorgehou word, dit gevaarlike gesentraliseerde toesiginfrastruktuur sal skep wat besonder ongeskik is vir Suid-Afrika se regeringswerklikhede.

Dr Ernst Roets, uitvoerende direkteur van Lex Libertas, het gesê dat die publiek gevra word om ’n staat met ’n kommerwekkende rekord van stelselfoute, chroniese onbevoegdheid en lae openbare vertroue met die mees intieme besonderhede van hul daaglikse lewens te vertrou.

‘Internasionale ervaring wys dat hierdie stelsels selde vrywillig bly en dikwels funksie-uitbreiding en misbruik moontlik maak. In die Suid-Afrikaanse konteks is die risiko’s onaanvaarbaar,’ het Roets gesê.

Die brief beklemtoon verskeie ernstige bekommernisse, insluitend:

• Toesiginfrastruktuur: Die verpligte registrasie van elke digitale ID-verifikasie vir minstens sewe jaar, wat ’n omvattende digitale spoor van burgers se bewegings en aktiwiteite skep. Dit kom neer op die skepping van toesiginfrastruktuur onder die vaandel van doeltreffendheid.

• Internasionale bewyse van mislukking: Ontwikkelende lande, soos Indië en Kenia, sowel as eerstewêreldse ‘suksesverhale’, soos Estland en Singapoer, het groot sekuriteitskendings, uitsluiting van burgers en funksie-uitbreiding ervaar.

• Vrywillig in naam, verpligtend in praktyk: Stelsels wat as vrywillig voorgehou word, word vinnig de facto verpligtend vir bankdienste, toelaes, indiensneming en noodsaaklike dienste.
• Waarom Suid-Afrika besonder ongeskik is: Chroniese regeringstelselfoute, enorme vermorsing op mislukte IT-projekte en Suid-Afrika se status as ’n lae-vertroue-samelewing wys waarom ’n stelsel soos hierdie bestem is om te misluk.

• Ideologiese risiko en konsentrasie van mag: Die gevare daarvan om breë diskresionêre magte aan die direkteur-generaal toe te ken in ’n regering wat herhaaldelik bewondering vir outoritêre gesentraliseerde regerings uitgespreek het.

Lex Libertas versoek die minister om ’n reeks gedetailleerde openbare vrae oor die uitvoerbaarheid, risiko’s en noodsaaklikheid van die voorstel te beantwoord, en doen ’n beroep dat die regulasies in hul huidige vorm teruggetrek word.

• Die volledige oop brief kan hier gelees word.

Lex Libertas sal voortgaan om openbare teenstand teen hierdie voorstel te mobiliseer en doen ’n beroep op elke lid van die publiek wat vryheid en privaatheid waardeer om hul stemme by te voeg.

• Die veldtog kan hier ondersteun word.

Lex Libertas is ’n ideesentrum en voorspraakgroep wat werk aan ’n lewensvatbare politieke bedeling in Suid-Afrika, gebaseer op die beginsels van vryheid, desentralisasie en selfregering.