Lex Libertas aanvaar Mahumapelo se uitdaging om Witkruisprojek-bewerings voor die Parlement te verdedig

Lex Libertas het formeel ’n uitnodiging van Supra Mahumapelo, voorsitter van die Parlement se Portefeuljekomitee oor Internasionale Betrekkinge en Samewerking, aanvaar om die bewerings van die Witkruisprojek voor die Parlement te stel en te verdedig.

Mahumapelo het op 19 Oktober ’n verklaring uitgereik in reaksie op ’n ope brief deur Lex Libertas se uitvoerende direkteur, dr. Ernst Roets, aan die Minister van Internasionale Betrekkinge en Samewerking, Ronald Lamola. In die verklaring het Mahumapelo Lex Libertas uitgedaag om sy bewyse oor onder meer plaasaanvalle, eiendomsreg en rasgebaseerde wetgewing in die openbaar voor die Parlement te lê, onder eed en onderhewig aan ondervraging.

'Ons aanvaar die uitnodiging,' het Roets gesê. 'As die Parlement die bewyse wil hê, sal ons dit bring. Ons is bereid om vrae te beantwoord, ons gevolgtrekkings te verdedig en ons bewerings aan openbare ondersoek te onderwerp.'

Lex Libertas het versoek dat die Portefeuljekomitee ’n formele openbare sitting reël. Die organisasie het ook voorgestel dat ander kenners wat die Witkruisprojek-konferensie in Washington, D.C. toegespreek het, genooi word om deel te neem, sodat die kwessies aan die hand van bewyse en argumente eerder as politieke slagspreuke ondersoek kan word.

In ’n ope brief wat vandag aan Mahumapelo gerig is, reageer Roets ook op verskeie bewerings in die parlementêre verklaring. Dit sluit in die karakterisering van die Witkruisprojek se standpunt oor plaasaanvalle en 'wit volksmoord', die Onteieningswet, B-BBEE, sanksies en internasionale skakeling.

Die brief wys verder daarop dat Mahumapelo se beskrywing van artikel 16 van die Grondwet verkeerd is. Artikel 16 bevat nie die uitsluiting rakende die wanvoorstelling van die land vir materiële voordeel wat in sy verklaring voorkom nie.

Lex Libertas verwelkom ook wat blyk ’n verandering of betekenisvolle verduideliking te wees van Mahumapelo se standpunt oor die ontneming van burgerskap. Sy jongste verklaring sê dat niemand voorgestel het dat iemand bloot weens ’n ander politieke mening van burgerskap ontneem word nie, en ontken dat hy gevra het dat burgerskap arbitrêr ontneem word.

'Die belangrikste ontwikkeling is dat die Parlement nou gesê het dat hierdie sake openlik getoets moet word,' het Roets gesê. 'Ons stem saam. Laat die bewerings duidelik gestel word, laat die bewyse ondersoek word en laat die beter argument seëvier.'

Lex Libertas se standpunt is dat die Parlement ’n gepaste forum vir hierdie gesprek is, maar nie die enigste legitieme forum nie. Die organisasie sal voortgaan om met instellings en beleidmakers binne Suid-Afrika én internasionaal te skakel.

Die volledige ope brief aan Mahumapelo kan hier gelees word.