Slagoffers van plaasaanvalle neem deel aan Witkruisprojek-konferensie en waak in Washington

Drie persone wie se lewens ingrypend deur plaasaanvalle in Suid-Afrika geraak is, sal op 25 en 26 September 2026 aan die Witkruisprojek-program in Washington, D.C. deelneem.

Hulle sal op 25 September hul ervarings by die Witkruisprojek-konferensie deel en sal ook op 26 September aan die Witkruisprojek-waak deelneem, wanneer 3 000 wit kruise op die National Mall geplant sal word ter nagedagtenis aan persone wat tydens plaasaanvalle in Suid-Afrika vermoor is. Die Witkruisprojek is ’n inisiatief van die Suid-Afrika-gebaseerde ideesentrum en voorspraakgroep Lex Libertas, in vennootskap met die New York Young Republican Club.

Die drie deelnemers is Amanda Platt, Heidie Taljaard en Leon Lotz. Elkeen sal ’n ander perspektief op die menslike gevolge van plaasaanvalle bied. ’n Kort beskrywing van elkeen volg.

• • Amanda Platt het ’n wrede aanval op ’n plaas buite Pietermaritzburg in Augustus 2023 oorleef. Tydens die aanval het ses gewapende mans probeer om hul weg in die huis in te dwing wat sy met haar man, Tim, gedeel het. Amanda is met ’n koevoet geslaan en met ’n spies gesteek. Een van die aanvallers het ‘Kill the Boer’ geskree terwyl hy probeer het om haar deur ’n gebreekte deuropening te sleep. Ten spyte van haar beserings het Amanda daarin geslaag om te ontsnap, alarm te maak en daarna na die huis terug te keer omdat haar man steeds binne was.

• • Heidie Taljaard het beide haar ouers, Dan en Breggie Brand, asook haar suster Elzabie verloor toe hulle in Julie 2020 op hul kleinhoewe naby Hartswater in die Noord-Kaap aangeval en vermoor is. Hul liggame is later in die veld gevind nadat hulle uit hul huis ontvoer is. Taljaard het sedertdien geskryf oor die trauma, rou, geregtigheid, vergifnis en geloof wat op die moorde gevolg het, en sal praat oor die blywende gevolge wat plaasmoorde vir die families wat agterbly, inhou.

• • Leon Lotz en sy familie het oor ’n tydperk van jare verskeie plaasaanvalle beleef. In 2010 het agt aanvallers sy skoonfamilie se plaas naby Parys binnegeval, waar sy skoonpa vermoor is, sy skoonma ernstig aangerand is en sy vrou, Adel, voor hul kinders verkrag is. Lotz het lede van sy familie oor die telefoon hoor skree terwyl hy na die toneel gehaas het. Sy getuienis sal fokus op die gevolge wat herhaalde gewelddadige aanvalle op sy familie en sy lewe as boer gehad het.

Lex Libertas het reeds die meeste van die ander sprekers aangekondig wat aan die konferensie sal deelneem. Hulle sluit die volgende in:

• • Dr Ernst Roets, uitvoerende direkteur van Lex Libertas, wat die doel van die konferensie sal uiteensit en die breër politieke en grondwetlike konteks sal bespreek;

• • Stefano Forte, president van die New York Young Republican Club, wat die Amerikaanse belang by ontwikkelings in Suid-Afrika en die lesse vir die Verenigde State sal bespreek;

• • David Ansara, uitvoerende hoof van die Vryemarkstigting, wat eiendomsreg, onteiening en grondbesettings sal bespreek;

• • Dr Martin van Staden, beleidshoof by die Vryemarkstigting en redakteur van die Race Law Index, wat rasgebaseerde wetgewing in Suid-Afrika sal bespreek;

• • Adv. Mark Oppenheimer, lid van die Johannesburgse Balie en kampvegter vir vryheid van spraak, wat politieke aanhitsing en die regshantering van haatspraak sal bespreek; en

• • Dr James Myburgh, redakteur van Politicsweb, wat die geskiedenis, statistiek en besondere aard van plaasaanvalle sal bespreek.

Die konferensie sal politieke aanhitsing, plaasaanvalle en landelike veiligheid, rasgebaseerde wetgewing, bedreigings van eiendomsreg, asook praktiese en langtermynoplossings ondersoek.

‘Die doel van die konferensie is nie bloot om statistiek, regsargumente of politieke teorie te bespreek nie,’ het dr. Ernst Roets, uitvoerende direkteur van Lex Libertas, gesê. ‘Dit is noodsaaklik dat internasionale gehore ook direk hoor van persone wie se lewens permanent verander is deur die geweld wat ons bespreek. Dit gaan nie oor abstrakte idees of syfers nie. Dit gaan oor werklike ervarings van werklike persone, families en gemeenskappe.’

Die Witkruisprojek het ten doel om die krisis waarmee minderheidsgemeenskappe in Suid-Afrika gekonfronteer word onmoontlik te maak om te ignoreer, en om groter internasionale bewustheid te kanaliseer na steun vir tasbare en volhoubare oplossings.

’n Omvattende dokument met die verhale van die drie deelnemers kan hier besigtig word.