Lex Libertas Launches 'Truth Be Told' Campaign

Lex Libertas \
Mediaverklaring \
27 Mei 2025

Lex Libertas stuur “Waarheid Moet Uit”-veldtog van stapel om stemme uit Suid-Afrika met die wêreld te deel

PRETORIA, SUID-AFRIKA — Die ideesentrum-drukgroep, Lex Libertas het vandag ’n internasionale bewusmakingsveldtog, waarheid moet uit, aangekondig met die doel om die stemme te versterk van mense in Suid-Afrika wat eerstehands die land se groeiende politieke en sosiale krisis beleef het.

Die veldtog volg op onlangse internasionale aandag, waaronder ’n video wat deur die VSA se president, Donald Trump, tydens ’n byeenkoms in die Withuis met president Cyril Ramaphosa van Suid-Afrika gewys is. Die video het die vervolging van minderheidsgemeenskappe in Suid-Afrika uitgelig. Ná die byeenkoms het verskeie kritici die video afgemaak as misinformasie of selfs as ’n sogenaamde “deepfake”. In reaksie hierop tree Lex Libertas nou op.

Dr Ernst Roets, uitvoerende direkteur van Lex Libertas, het verduidelik dat die gesprek oor die situasie in Suid-Afrika té gefokus geraak het op statistiek en die vertolking daarvan, en dat persoonlike verhale in die proses verlore gaan. “Die debat oor statistiek is belangrik, maar dit is net een deel van die groter prentjie,” sê Roets. “Daar is ’n oorvloed persoonlike stories waaraan die wêreld aandag behoort te gee, en Lex Libertas gaan ’n proses fasiliteer om daardie stories te deel.”

“Hierdie veldtog gaan mense in Suid-Afrika — en dié wat al tyd hier spandeer het — ’n platform gee om vir hulself te praat,” het hy bygevoeg.

Lex Libertas sal persoonlike stories en getuienisse versamel en dit aanbied aan rolspelers in Suid-Afrika, die Verenigde State, en by internasionale forums. Hierdie stories sal ook gebruik word in internasionale uitreikaksies, onder meer deur internasionale podsenders en dokumentêre filmmakers na Suid-Afrika te nooi om self met plaaslike mense te gesels.

Die veldtog nooi spesifiek bydraes oor die volgende onderwerpe:

• Plaasaanvalle


• Rassediskriminasie en uitsluiting van minderhede


• Die bedreiging teen eiendomsreg


• Die gevolge van staatsverval



“Elkeen in Suid-Afrika het ’n storie — van hoop, hartseer, stryd of oorlewing,” sê Roets. “Wanneer die waarheid vertel word, word verandering moontlik.”




Enigiemand wat persoonlike insigte het oor bogenoemde onderwerpe, is welkom om hul stories in te stuur.




Stories (500 woorde of minder) kan via die Lex Libertas-webwerf ingedien word.



• Persone wat hul stories wil deel of meer oor die veldtog wil leer, kan besoek: https://www.lexlibertas.org.za/af/truthbetold/


• Media-uitsaaikanale en podsenders wat belangstel om met deelnemers in gesprek te tree, kan Lex Libertas kontak by: media@lexlibertas.org.za

Media Navrae: \
Dr Ernst Roets \
Uitvoerende Direkteur \
Lex Libertas \
E-pos: ernst.roets@lexlibertas.org.za \
Webwerf: www.lexlibertas.org.za